Edisi 13

Edisi 13

Ikamkah

Kucari nangapa nang musti kudapat

balampar kasunyian malam bahihinipan mahambusakan

bisikbisik tingkah angin

Padahakan lawan diaku siapa nang maaur

sahiris bulan nang asyik bacaramin di tangah kulam

Ikamkah

Tarasa bujur ada tajam jarum kambang malati

mancucukcucuk rista badanku

Kusingkap janakan mataku manjadi saratus halar

maunjir kamana umbak kulam masuk ka dalam

garunum bibirku

Ikamkah

Padahakan lawan diaku siapa nang badundang

lamatlamatan di subarang

Kambit baju carik sabuncu

Ngangal hinak batis balancat

Sakit badan tarasa ngilu

Sangkal di hati kada badapat

Balalu

Kamana waswas manyimpan burinik dalam badanku

Kamana jua aayun bibir mun humbayang hilang bagasut

Humbayang nang hilang bagasut

Disangka punai tarabang hinggap

Tabayang diri lawas taungut

Marista badan di malam kadap

Ikamkah

Mangancing langkahku haratan aku mambuka ingatan

bamamalaman maitihi muhaku di muhara kulam

timbultinggalam

atawa padahakan lawan diaku

langitkah mamuruk kakamban

mamuruk nangapa nang ikam sambunmyiakan

di dasar kulam daham

Ikamkah

Inguianku maricih pitung ricih panjanakan

mahiris pitung hiris bulan sahiris

Kulam masih jua maampar pitung kasunyian

maampar kur sumangat

Ikamkah

Banjarbaru, 2005

Darah

Adalah langit darah badarah

kada habishabis jadi laut babaharikala

sudah daham bapaus di atasnya rajah parahu Nuhmu

kada sing singgahsinggah ka darmaga darahku

Hu Allah darahku larut dalam darahmu

kutubku tinggalam dalam kutubmu

mahumpating napas darahku mambatubara

di kunci rahasia Alifmu Alif Alif

basingguguk darah adamku nang tahumpair

di bumi nang japuk

babaharikala bakikih mancari darah hawaku

nang japuk tasasat di balantaramu

manggiraung darah laparku

mangarukutngarukut mancari darahku

barii pang aku barang satitik Hu Allah

gatar alir hinak manyaru darahku

mangalir darah mataku

mangalir darah musafir di sajadahmu

mangalir manuju rumahmu

darah hidupku Hu Allah

darah matiku Hu Allah

darah hidupmatiku Hu Allah

darah garaungku Hu Allah

darah karukutku Hu Allah

darah laparku Hu Allah

darah hausku Hu Allah

darah ngiluku Hu Allah

darah dandamanku Hu Allah

wayahmana darah daham karingkaring

mandustaakan firmanmu wan kada baampihan

maninggalakan jalanmu

malam cakahada lagi malam

siang cakahada lagi siang

bulan bintang matahari kahilangan tarang

napang tih lagi nang kahawa manitikakan

darah kahidupan Hu Allah

samista baguncang Hu Allah

arasy gin baguncang Hu Allah

darahku naaujubillah

darahku astagfirullah

darahku subhanallah

Allah

Banjarbaru,2004