Edisi 17
Baradapradap
Di pancung haluan aku manyusun sila
Talapak tangan kalang batangkup
Mamuja bantam mambuka lawang jagat
Turunlah ikam panjaga langit
Parahuku miring karam janganlah karam
Aku tutus CandiAgung
Handak bulik ka Nagara Dipa
Aku Lambung Mangkurat
Parahuku Prabu Yaksa
Dangar dangar aku bakiau
Dangar dangar aku manyaru
Ikam turun di kukus dupa
Ikam turun di kukus manyan
Tujuh bidadari babaju layang
Bakakamban habang
Rambut bauntai kambang bogam
Gulu barenteng samban barangkap
Tarabang layang matan kayangan
Turun ka haluan lalu baradapradap
Manampungtawari lawan baras kuning
Mahamburi lawan kambang rampai
Di panjuru masyrik
Di panjuru magrib
Di panjuru paksina
Di panjuru daksina
Datanglah angin tutus
Maangkat Prabu Yaksa
Nang kandas di muara mantuil
Imbahitu balayarlah manuju nagaranya
Banjarbaru, 2006
*** Kisah Tari Radap Rahayu
Nisan Balumur Darah
Kambang laus
Kambang laus cundai ditampur angin
Luruh sakaki luruhlah ka banyu
Hanyut ka subarang
Sudah putus
Sudah putus hatiku kada kalain
Biar badanku biar badanku
Diambil urang
Duhai kakasih sadikitdikit kada lapas matan ingatan
kaganangan dalam ragabadanku nang paling dalam
Mata kilirkiliran si banyu mata
Nasib kada bauntung mamasung di kamar rista
Datanglah wahai kakasih lapasakan rantai adat nang maikat
batistanganku
Datanglah
Datanglah wayah pian manulungi ulun matan galugur api
Rista ulun labih daripada api nang manyalukut
Duhai angin sampaiakan rista diriku ini
Lawan Kaka Masyhur
Malam kada rasa malam
Siang kada rasa siang
Matahari bulan wan bintang
Wahai kamana jua manyambunyiakan tarang
Ulun tabantai dalam kakadapan
Duhai datanglah hati ulun mangganang
Kaka tarus bukah mambawa hati ading di tangah angin nang kancang
Sampai kaka bulik kahadiratNya biarlah wahai adingku Fatimah
Biar kada jua basatu ragabadan namun adinglah saurang dalam jiwa kaka
Kaka sadar garisan darajad nista
Kada kuasa malapasakan rantai rista ikam dingai
Di atas tikar kahidupan ini kaka rabahakan badan
Bukah di tangah angin tarus bukah
Bukah sampai ka watas pahabisan langit nafas kaka
Basangu hati ikam dingai
Tanduan siapa nang diusung tanduan siapa
Siapa garang duhai langit barakun
Sabuah nama bakajutan manyambar hati Fatimah jadi
ramuk
Bahihinipan inya manyasah tanduan itu
Mangunyungi batang banyu
Kubur itu sudah sunyi di basah hujan
Harum kambang rampai wan harumnya darah cinta
Saurang bujang bungas langkar rabah tasungkam dicuring batu nisan
Maunjir sang kakasih wan punahlah sagala rista
Lapang dalam palukan sang kakasih
bb.’94
Tidak ada komentar:
Posting Komentar