Edisi 23
Dundang Rista Saribu Burung
Yulan ya lalalin
Dahan mana aku bahinggap
Rakun mana aku bahalar
Matahari mana aku batarang
Banua jadi bayangbayang
Hutan kahilangan puhun
puhun kahilangan daun
Rista langit luka manganga
Dayak nang sangsara
Pagunungan maratus hancur
Carubung asap masin panabang amuk
Rampuk nang mabuk
Damaklah mataangin
Sabab guntung hilang puaka
Sungai hilang muara
Kambang halalang tarabang
Kapak halar nang riwang
Yulan ya lalalin
Kamana sanyap kamana ratap
Kamana kapak kamana ratak
Dalam sambilu masin gargaji
Manyarulah sakuat batubatu yang ramuk
Puhunpuhunan nang rabah
Rumah adat nang tabalah
Dalam parangkap eksploitasi
Wan panambang liar mambabi
Tarabanglah burung saribu burung
Mambusur bianglala
Ruh datunini manyumpah
Kalimantanku pajah
Dundang rista saribu burung
Adalah rista dayak tasingkir
Matan tanah pusaka
Darah gatah kayu talikan adalah
Darah dayak tumpah matan balainya
Yulan ya lalalin
Hutan baratus tahun
Ditabang habis
Batubara dikikis
Hagan kasugihan tuantuan
Kami disipak
Ka padangpadang pangasingan
Tasingkir ka bukitbukit pamburuan
Kabibitak
Anak sima
Halimatak
Buburaya
O napa bidanya lawan tuantuan
Ladang kahidupan
Kubur kahidupan
Ruh datunini manyumpah
Kalimantanku pajah
Nyalaakan damar diuluulu
Maratus manangis
Biarakan darah mangalir
Batandik di duri rukam
Oi ambilakan sumpit buluh kuning
Di gununggunung batuampar
Ikat talimbaran
Di pancurpancur
Amun pacah bulanai
Jangan dipagat akar kariwaya
Pagari ruh lawan tulangtulang
Pagari ruh lawan darahdarah
Tajaki tunggul puaka di riamriam
Ruh datunini manyumpah
Kalimantanku pajah
Banjarbaru, 2002
Dundang Saribu Pananjak
Garimis napa garimis aku tajabak
Dalam lunta angin napa angin rimba
Matan tabing tapi aku kada handak
Mandangar tinghui sanja kada handak mandangar
Ikam sambat atas ngaranku
Dundang, alahai
Sungai baulak di batubatu
Daras mangalir sagala rindu
Kutajak saribu pananjak
Dalam tangkis jarajak
Lanting manyusur arus
Kamana paluh zikir didundangkan
Kutinggalakan saribu suratan
Saribu daunhaur mandasau
Mangaringakan banyumata
Mangaringakan saribu rista
Anak nagri matan liring gunung
Mangarung sungai rindu
Dundang, alahai
Wastu sungai nang mamahami
Pupuhunan drampuk
Isi bumi dirampas
Bala anak nagri
Balanting mambasuh sagala luka
Garimis napa garimis aku tajabak
Dalam lunta angin napa angin rimba
Uap fosilbatubara
Tapi aku kada handak mandangar
Ikan sambat atas ngaranku
Dalam gumpalan hirangarang
Du’a saribu pananjak
Di alir kita banafas
Di batubatu kita manyaru
Diulak kita manari
Di daras kita banyanyi
Malapas sangkal di hati
Tapi aku kada handak mandangar
Ikam sambat atas ngaranku
Dundang, alahai
Malupa sagala ganang
Malupa sagala bayang
Balahindang di atas sungai
Lanting di atas sungai
Saribu pananjak
Harapan di atas ratap
Tinggalam janganlah tinggalam
Di dasar banyumata
Maka aku kada handak mandangar
Ikan sambat atas ngaranku
Diayun saribu pananjak
Di sungai kada suah bimbang bacinta
Malupa sagala ganang
Malupa sagala bayang
Dundang, alahai
Banjarbaru, 2002
Syair Gurdah
Siapa mambaca syair gurdah
Di tangah malam wayah bulan mamancar
Rumahrumah wan pupuhunan pada sunyian
Manyingkap antumantum
nang dihampar angin
Mataku kilirkiliran mambaca diri
Dialun tarbang
Dalam dundang saluruh pujian wan dua
Bulan mamancar
Bulan sabuku di dalam dada
Mamancar Subhanallah
Kamana kita manyimpunakan harapan
Kasitu kita bulik manyarahakan diri
Banjarbaru, 2006
Balahindang
Di langit aku malihat balahindang
Turun ka laut manyamburakan api
Mancari dirinya dalam rawi nang sudah tinggalam
dimakan jaman
Dandaman lawan wadah badiam
Rumah babubungan tinggi
Dandaman sabigi hintalu
Asalnya jadi naga
Banua kada saling tawasan lagi
Badimapa handak mancari
Balahindang marista diri
Diharunya laut jadi galumbang ganal
Hujan wan ributributnya
Mudahan jangan sampai kamari
Banjarbaru, 2006
Tidak ada komentar:
Posting Komentar