Sabtu, 01 Maret 2008

Edisi 12

Edisi 12

Maunjir

Bahahar mataku dalam asap dupa malam

Daham bintangbintang maantar suluh

Talanjur purun kamana jua tarabang

burung pialing mahaga nasib

Badimapa lagi mun jambatan licin

Rasa sasak pahinakan dalam dada

Kahandak hati kada pang tumbuh

kambang sarai di padang jumampai

Tangah malam apa pang rasanya

Wayah diingat sasain jua kaganangan

lacuk mambari alamat nang di subarang

Kunahapi jajak

Ai kamana paguringan mambuang limbai

Wastu

Mun manampur kamana palimbaianku

Mun mahaga kamana lurung nasibku

Mun mimpi ada juakah saintilan barang

jangan mahayut guringku

Banjarbaru, 2005

Nyanyian Ruh

Imbah sampai di puncak

Nyanyian dalam pangrasa lamatlamatan

maulah aku jadi musapir bahalar

masuk ka dalam kukus kamanyan

Aku tapiasat jalan lalu lunglai

ka dalam diriku saurang imbahitu tajalapak

Mataku kada kawa lagi babuncilak

Ikam basungkup mahintipakan di bulubulu mataku

haratan kukus manyan maulakulak

nyanyian nang salawasini ikam nyanyiakan

Aku banyanyi dalam nyanyian ikam

banyanyi wan hinak sunyi

Kayu candana manampur matan balukar

Tahutahu aku kahilangan liriklirikku

bulubulu halarku luruh

luruh dalam api padupaan nang sasain nyarak

sasain jua rambut malam maurai

Daham diganangakan apa nang takandung di ragabadan

jiwa nang balilihan wan basahnya tanah

bau adam nang mambalahbalah banyumata

Aku tahuai ikam mangiaungiau ngaranku

Apa nang harus kusahuti aku gin jauh matan diriku

Tanganku maragap sunyi

Tapi mun ikam mancium kukusku

Nangitulah bara api padupaan ruhku

Aku gin tahu nyanyiku bakacimuang

lawan kalatikan suara sunyi

Bibirku gin pacah mangiau ngaranku

wayah ikam mangiau ngaranku

haratan padupaanku kalatikan

mahambusakan kukus hinakku

Tapi mun ikam bangsul matan bulubulu mataku

Ayuam daham kita banyanyi dikadapnya malam

di ruh nang sunyi ayuam

Banjarbaru, 2005

Tidak ada komentar: