Edisi 14
Kisah Satangkai Kambang
Sampurnaakan ingui satangkai kambang
Supaya mimpi daham galisah
Wayah baisukan dibasuh tangisan kacil
Tapi aku kada handak siapa haja
Maaur hujung kalupaknya
Sabab satiap titik ambun
Adalah suara rintihan riwayat
karinduan
Kada parlu jambangan
Sabab akulah jambangan satiap rintihan
Tuhan kutaruh kayakinan
Jangan angkau sambunyi di balik anganangan
Banjarbaru, 2001
Kisah Saikung Hong
Di bawah bulan ikam marajut parca sutra
Kuputikakan malati di sasala mehwa
Angin Gobi manampur di daratan
Tapi ikam sudah maranakan saikung Hong
Di bulan Desember ikam bariakan samunyaan
dalam tiupan sangangwalas lilin habang
wan aku wan saban baisukan
kita kagum mandangar kicaunya
Wayah inya tasasat di hutan Yang Liu
wan kada suah bulik lagi Sui Lan
Wayah nitu jua kada suah lagi
Aku mandangar nyanytian Chun Chiu
Di dalam malam nang kadap
paguringan kada suah lagi mambari arti
Di mata tapajam aku bapuat
matan rabuk bintangbintang
Kujanaki pucuk hutan pinus
wan tinggalam di sungai Yang Tze
Banjarbaru, 2001
Kawin Jingah
Imbah duduk di pinggir sungai parak puhun jingah
Puhun nang maulah aku asa takurihing
Sungai wan puhun jingah nangini
Maungkit masa hidupku wayah kakanakan
Sungai adalah kahidupan kakananakan
Sungai nang mambari kasihsayang
Aku kada kawa dipisahakan wan sungai
Aku mun habis sakulah wan kakawanan
Musti ka sungai nangini mandi balumba
Basasalaman bauusahan basisimburan baaajakan
Aku paling katuju mun baaajakan
Siapa nang kalah bahumpimpah inya ajak
Inya harus manyasahi musuhnya lalu manangkapnya
atawa manjapainya
Siapa nang tajapai inya ajak
Kakawanan kada nang waninya naik ka puhun jingah
Tapi aku wani
Aku katuju matan cikang puhun jingah bacabur
Mun handak bacabur mataku lingaslingas dahulu
Bursiah ada Nini Aluh
Sidin sarik mun malihat balalu manyasahi
Di tangan sidin kayu bapangkih
Suah aku kalihatan sidin
Liwar sariknya
Kada kawa lagi mambayangakan muha sidin wan mata sidin
Sambil manyingsing tapih sidin manambirau :
“ Sudah kupadahakan kada pamaasianlah
jarku jangan bananaik puhun jingah kalu kapuhunan
ngalih kaina dasar anak nangapa ikam
kapala bapanya ! “
Aku taburisit maancap turun
bagagas maambili baju lalu mamparacau bukah
Kada tahu burit kapala lagi
Sudah babarapa hari ini aku kada kawa sakulah
Muhaku bangkak wan gatalgatalnya
Awak pina mariapdingin
Barabahan haja
Abah wan mama wan dangsanak lainnya pina abut
malihat diaku
Nang paling abut niniku, Nini Aluh
Sidin bamamai nangkaya kalalatu : Han hapus tia ngituam
Parigal anak nang kada masuk banyu
Muul dipadahi. Jara kada.
Ayu kita basisiap, sadiaakan tali kain hirang
Kita badatang
Samunyaan takurihing malihat diaku
Aku diantar Nini Aluh ka puhun jingah
Aku didudukakan di atas akar jingah
Jar sidin : Hari ini aku kawinakan ikam lawan puhun jingah
Wan jujurannya saikat tali kain hirang
Lalu sidin maikat akar jingah wan tali kain hirang
Jadi tuhai puhun jingah nangini jadi bini ikam sudah
Ai imbah tuntung
Sakalinya muhaku ampih bangkak
Aku jadi waras
Jar Nini Aluh : Aku kada pang manangati mandi
Tapi baiingat jangan sampai maulah jadi mudarat diri
Han imbah nangitu aku jara katahitahi
Kada wani lagi bananaik puhun jingah di pinggir sungai
Kada wani lagi mandi balumba sampai malupa
Sampai mata jadi habang
Banjarbaru, 2006
Tidak ada komentar:
Posting Komentar