Edisi 24
Batu Manangis
Sudah barapa ratus tahun badiam dalam guha
Marista diri manyasal balalawasan
Banyumata kada bakakaringan manjadi pancuran
Mahadang kuitan datang mambari ampun
Kada tahu lagi adakah malam adakah siang
Wastu kadap basuluh kunangkunang
Saban waktu ( hujanpanas ) paraw bakiaw
bacampur kuciakan wan tangisan maminta tulung
dalam kapal di angin ribut di galumbang manggalur
hujan wan patirpatirnya
Kilat manyambar Raden Pangantin si anak durhaka
manjadi batu
Diang Ingsun baubah halang sapah
Wayah tangahari atawa sanja tarabang di sasala rakun manyuruh
anaknya bulik
Di puhun angsana maingui manyasali sumpahnya
“ Guha nang baratus tahun siapa pang nang hakun paduli
mamikirakan sakira manjadi wadah caramin tuladan anakcucu
nang kahilangan rawi kasugihan banuanya
Alllahualam “
Banjarbaru, 2006
Simbangan Burung Laut
Biar angin sadarasdarasnya
Manyapu parmukaan laut bagalumbang
Biar pantai mangisahakan ristanya
Sabab akulah burung laut
Nang mahabarakan ka jagatjagat
Galumbangkagalumbang adalah
Galur dalam jiwaku
Marajah rindu di pasirpasir
Aku manari saurang
Supaya aku kada maingatakan lagi masadahuluku
Manggantung di tabingtabing batu
Maka basanjalah samista
Kurinduakan matahari manjadi sagumpal darah
Mangalir di garis langit wan laut
Parahuparahu nalayan sudah lawas kapinggir
Batubatu karang sudah manjadi patung sunyi
“kada uyuh hatiku marindu
rindulah badan harapan kadalah sampai
apalah artinya lawas manunggu
banyu pang mata jatuhlah badarai”
Padahakan wan angin : akulah laut
Padahakan wan laut : akulah galumbang
Padahakan wan galumbang : akulah pantai
Padahakan wan pantai : akulah pasir
Padahakan wan pasir : akulah buih
Padahakan wan buih : akulah rajah nang marindu
matahari
Padahakan wan matahari : akulah burung
Nang manari mangitari langit
Nang manari maniup angin
Ristaku rista pantai
Ristaku rista parahu
Ristaku rista karang
Ristaku rista marindu
Maka sagumpal darah nang mangalir dalam jiwaku
“kadada galumbang kadada laut
kadada laut kadada pantai
sibang oi, simanggu kacil
manyaru
kasih jangan bacarai ”
Simbang oi,
Atas ngaran cinta
Arung pada di masyrik
Arung pada di magrib
Arung pada di paksina
Arung pada di daksina
Simbang oi,
Banjarbaru, 1980
* simanggu kacil : ngaran gamalan Banjar wayahini
baandak di Museum Pusat
pasangannya simanggu basar
baandak di Museum
Lambung Mangkurat Banjarbaru
Daun Luruh
Daun luruh
Di jalanan
Tajajak talincai urang lalulalang
Jaka hingkat bakuriak lawan siapa maminta tulung
Tapi inya daun
Sahibar daun
Daun
Banjarbaru, 2006
Tidak ada komentar:
Posting Komentar