Edisi 11
Apa Nang Ikam Ungutakan Norsitah
Bakajutan hujan mandasau
jalanan takulipik atap rumah maingui
ari hilang latat
Danau Kota pantar kahilangan sumangat
Ikam pina kada tahutahu bacugutan di muhara
kaca lalungkang nang sabujurnya sudah
mangabur kana tampias
Apa nang ikam ungutakan Norsitah
Haratan hujan bamula taduh
Norsitah kadada lagi di situ
nang ada guratan jari di kaca :
Hujan dalam ragabadanku talanjur purun
manyapu ngaran nang ikan tulis
di hatiku dahulu hurufhurufnya nang suah
kuhapal bujur malahan tahija dalam igauanku
Danau Kota balangsar balajar mahija
humbayang diriku nang sasain jua mangabur
Kualalumpur, 2004
Violces Norsitah
Aku sudah tuhuk jua mambisai guringku
bamamalaman mambiarakan angin
maluruhakan cahaya lampu
kahiga malam nang kada babulan
Tahutahu kanapa kambang violces
di jambanganku samarbak maharumi paguringanku
Kada sawat aku mambuka lawang :
“Aku datang masuluh bintang”
Isuknya aku kaganangan violcesku
Aku taungut
Inya sudah kada bakalupak lagi
Kualalumpur, 2004
Kumarau
Siapa mahantak kurungkurung
dikapabisan burung babunyi
jalan satapak mancari watas
hindang ari
manyusaur suara kaririang maingui
di sasala kayukayuan
haratan matahari mancarucuk
Wayah manyubarang guntung
ikam baucap
Siapa mahantak kurungkurung
dikapabisan burung babunyi
samantara hindang ari bahindala
sasain jua ari panas manggantang
Tanah huma kaya siput dipais
sunyi kada sing garutukan
dalam latupan buah para dimamah
matahari
Banjarbaru, 2005
Tidak ada komentar:
Posting Komentar